അടുത്ത ബന്ധമുള്ള രണ്ടു മത സമൂഹങ്ങളാണ് മുസ്ലിംകളും ക്രിസ്ത്യാനികളും. ക്രൈസ്തവ സമൂഹം ഏറ്റവുമധികം ആദരിക്കന്ന യേശുവിനെ മുസ്ലിംകളും ആദരിക്കുകയും അംഗീകരിക്കുകയും ചെയ്യുന്നു. ഖുര്‍ആന്‍ വരച്ചുകാണിച്ച യേശുവിന്റെ ജീവിതവും സന്ദേശവും മലയാള വായനക്കാരുടെ മുമ്പില്‍ സമര്‍പ്പിക്കുന്ന ലഘു കൃതിയാണിത്. യേശുവിനെ സംബന്ധിച്ച ഖുര്‍ആന്റെ വെളിപ്പെടുത്തലുകള്‍ ക്രൈസ്തവ സഹോദരങ്ങള്‍ക്ക് നൂതനമായ ഒരനുഭവമായിരിക്കും. മുസ്ലിം-ക്രൈസ്തവ ധാരണകള്‍ കൂടുതല്‍ യാഥാര്‍ഥ്യാധിഷ്ഠിതവും സൌഹാര്‍ദപരവുമാകാന്‍ ഈ കൃതി സഹായിക്കുമെന്ന് പ്രതീക്ഷിക്കുന്നു.

ഈശോ മിശിഹായുടെ സംസാര ഭാഷയായ അരമായയിലൂടെ അവിടുത്തെ സന്ദേശങ്ങളെയും ദൈവരാജ്യ സങ്കല്‍പത്തെയും പഠനവിധേയമാക്കുകയാണ് ഈ ഗ്രന്ഥം. സൃഷ്ടി സ്ഥിതി സംഹാരങ്ങളുടെ ഉടമയായ ഏക സത്യ ദൈവത്തിന്റെ നിയമങ്ങള്‍ക്കെ മനുഷ്യന്‍ വിധേയനാകേണ്ടതുള്ളൂ എന്ന വിപ്ലവകരമായ വിമോചന സന്ദേശം ഈശോ മിശിഹായുടെ സുവിശേഷങ്ങളിലൂടെ ഇവിടെ ഇതള്‍ വിരിയുന്നു. അധര്‍മങ്ങളും അസമത്വങ്ങളും നിറഞ്ഞ മനുഷ്യന്റെ രാജ്യത്തുനിന്നും സമത്വസുന്ദരവും നീതിനിഷ്ഠവുമായ ദൈവത്തിന്റെ രാജ്യത്തിലേക്കുള്ള പ്രയാണമാണ് മനുഷ്യന്റെ ജീവിതലക്ഷ്യം എന്ന ദൈവിക ദര്‍ശനത്തെ വീണ്ടെടുക്കുകയാണ് ഈ കൃതി.

മതമേതായാലും മനുഷ്യന്‍ നന്നായാല്‍ മതി എന്നത് മരുന്ന് ഏതായാലും രോഗം മാറിയാല്‍ മതി എന്നു പറയുംപോലെ നിരര്‍ഥകമാണ്. ദുര്‍ബലമായ ഇത്തരം അടിത്തറകളിലാണ് സര്‍വമതസത്യവാദം പടുത്തുയര്‍ത്തപ്പെട്ടിരിക്കുന്നത്. എല്ലാ മതവും ഒരേപോലെ സത്യവും സ്വീകാര്യവുമാണെന്ന് ശ്രീനാരായണഗുരു ഉള്‍പ്പെടെ മതാചാര്യന്മാരാരും അഗീകരിച്ചിരുന്നില്ല. സര്‍വമതസത്യവാദത്തിന്റെ ബാലിശത വ്യക്തമാക്കുന്ന ലഘുകൃതി.

സാമൂഹിക പ്രവര്‍ത്തകനായ ഒരു ഹിന്ദു സന്ന്യാസിയുടെ ഖുര്‍ആന്‍ വായനാനുഭവങ്ങളുടെ സാരാംശമാണ് ഈ കൃതി. ഖുര്‍ആനെ കുറിച്ചും അതിന്റെ ഉള്ളടക്കത്തെക്കുറിച്ചും സഹോദര സമുദായങ്ങള്‍ക്കിടയില്‍ തെറ്റിദ്ധാരണകളും ദുരൂഹതകളും പടര്‍ത്താന്‍ ബോധപൂര്‍വമായ ശ്രമങ്ങള്‍ നടന്നുകൊണ്ടിരിക്കുന്ന സമകാലിക സാഹചര്യത്തില്‍ സ്വാമിയുടെ ഈ ഖുര്‍ആന്‍ വായന മതസമൂഹങ്ങള്‍ക്കിടയില്‍ പരസ്പര ധാരണയും സഹവര്‍ത്തിത്വവും വളര്‍ത്താന്‍ ഏറെ പ്രയോജനം ചെയ്യും.

മനുഷ്യനെ നേര്‍മാര്‍ഗത്തില്‍ നയിക്കാന്‍ ദൈവിക വെളിപാടിന്റെ ആവശ്യം യുക്തിപരമായും പ്രാമാണികമായും അവതരിപ്പിക്കുന്നതോടൊപ്പം വിശുദ്ധ ഖുര്‍ആന്‍ അടിത്തറയാക്കി ഭാരതീയ വേദങ്ങളെ വായിക്കുന്ന ഗ്രന്ഥം. മാറ്റത്തിരുത്തലുകളും കൂട്ടിച്ചേര്‍ക്കലുകളുമെല്ലാം ഉണ്ടായിട്ടുണ്ടെങ്കിലും വേദങ്ങളില്‍ യഥാര്‍ത്ഥ പ്രവാചകാധ്യാപനങ്ങള്‍ ഉണ്ടാകാനുള്ള സാധ്യതയാണ് ഗ്രന്ഥകാരന്‍ അന്വേഷിക്കുന്നത്.

ഈ പഠനം ക്രിസ്തുമതത്തെ വിമര്‍ശിക്കാനോ ഇസ്ലാംമതത്തെ പുകഴ്ത്താനോ ഉള്ളതല്ല; ആത്മാര്‍ത്ഥമായ സത്യാന്വേഷണമാണ്. ക്രിസ്ത്യാനികളില്‍ പലര്‍ക്കും അറിയാത്ത കാര്യങ്ങള്‍, വിശുദ്ധ ഖുര്‍ആനില്‍ ഈശോവിനെക്കുറിച്ചും മാതാവ് മറിയത്തെപ്പറ്റിയും പറഞ്ഞവ നിഷ്പക്ഷമായ വീക്ഷണത്തില്‍കൂടി സത്യസന്ധമായി പ്രകാശിപ്പിക്കുന്നതിനുള്ള ശ്രമമാണ് ഈ ഗ്രന്ഥത്തിന്റെ താളുകളില്‍ നാം ദര്‍ശിക്കുന്നത്. ആത്മാര്‍ത്ഥമായ പഠനത്തിനും ചര്‍ച്ചകള്‍ക്കും ഈ ഗ്രന്ഥം വഴിതുറക്കുമെന്ന് നമുക്ക് പ്രത്യാശിക്കാം. അവതാരികയില്‍ ഡോ. മാര്‍ അപ്രേം മെത്രാപ്പോലീത്ത.

ഭാരതീയ സംസ്കൃതിയില്‍ ഏകദൈവവിശ്വാസത്തിന്റെയും സെമിറ്റിക് പ്രവാചക സന്ദേശങ്ങളുടെയും തായ്വേരുകള്‍ കണ്ടെത്താനുള്ള ഗവേഷണത്തിന്റെ ഫലമാണ് ഈ കൃതി. ഇന്തോ-ആര്യന്മാരുടെ ആഗമനത്തിനു മുമ്പുള്ള പ്രാചീന ഭാരതീയ ജീവിതത്തിന്റെ സാംസ്കാരികമായ അടിയൊഴുക്കുകളാണ് ഗ്രന്ഥത്തില്‍ ചര്‍ച്ച ചെയ്യപ്പെടുന്നത്. വ്യത്യസ്ത വംശങ്ങളും നാഗരികതകളുമായി വഴിപിരിഞ്ഞ് ബഹുദൈവാരാധനയിലേക്ക് മനുഷ്യരാശി നിപതിക്കുന്നതിനു മുമ്പുള്ള സാംസ്കാരിക പ്രഭാവം ശുദ്ധമായ ഏകദൈവത്വമായിരുന്നുവെന്ന് ഗ്രന്ഥകാരന്‍ സമര്‍ത്ഥിക്കുന്നു. പശ്ചിമേഷ്യന്‍ ചരിത്രത്തില്‍ പാദമുദ്രകള്‍ പതിച്ച ആദിമ ജനപദങ്ങളും ഇന്തോ-ആര്യന്മാരും തമ്മിലുള്ള വര്‍ഗശാസ്ത്രപരവും സാംസ്കാരികവുമായ ബന്ധവും ഇതില്‍ സമര്‍ത്ഥിക്കപ്പെടുന്നു. ഭാഷാ ശാസ്ത്രത്തിന്റെയും മത സാഹിത്യങ്ങളുടെയും പുരാവസ്തു പഠനങ്ങളുടെയും പിന്‍ബലത്തോടെ ഗ്രന്ഥകാരന്‍ നടത്തുന്ന നിശിത നിരീക്ഷണങ്ങളും യുക്തിഭദ്രമായ നിഗമനങ്ങളും വായനക്കാരില്‍ കൌതുകമുണര്‍ത്താതിരിക്കില്ല. വൈജ്ഞാനികമായ പഠന-മനന മേഖലകളിലേക്ക് കൃത്യതയുള്ള ദിശാബോധം നല്‍കുന്ന ഈ പുസ്തകം മലയാള ചരിത്ര ഗവേഷണ ശാഖയ്ക്ക് ലഭ്യമായ വിലപ്പെട്ട സംഭാവനയാണ്.