പെണ്ണില

വിഷ്ണുമായ എം.കെ

വിഷ്ണുമായയുടെ ഓരോ വാക്കും ദിവ്യാസ്ത്രങ്ങള്‍ പോലെയാണ്. തൊടുത്തയച്ചാല്‍ അത് വായനക്കാരെ ഛിന്നഭിന്നമാക്കി കൃത്യമായി എഴുത്തുകാരിയുടെ ആവനാഴിയില്‍ തിരികെയെത്തുന്നു. അതിന്റെ മൂര്‍ച്ചയില്‍ വായനക്കാരെപ്പോലെ എഴുത്തുകാരിക്കും മുറിവേല്‍ക്കുന്നു.
– അഖില്‍ കെ.

സൃഷ്ടികര്‍മ്മത്തിലേര്‍പ്പെടുന്ന ദൈവവുമായി ജനിമൃതിസമസ്യകളുടെ പൊരുളിനെക്കുറിച്ചു തര്‍ക്കിക്കുകയും നീതിയുടെ സ്ത്രീ-പുരുഷ ഭേദത്തിന്റെ പേരില്‍ ദൈവത്തെ ചോദ്യംചെയ്യുകയും ചില നേരങ്ങളില്‍ മഹാവ്യസനങ്ങളുടെ കടലില്‍ മുങ്ങിത്താഴുന്ന
ദൈവത്തിനു കൂട്ടിരിക്കുകയും ചെയ്യുന്ന ജാനകി. ജീവിച്ചുതീര്‍ക്കാന്‍ സ്വയം വെട്ടിയുണ്ടാക്കിയ ഏകാന്തപാതപോലും പുരുഷാധിപത്യത്തിന്റെ കടുംനിഴലുകളില്‍നിന്ന് മുക്തമല്ലെന്നറിഞ്ഞ് ആത്മവഞ്ചനയ്‌ക്കൊരുങ്ങാതെ ആത്മാദരത്തിന്റെ സൂര്യവെളിച്ചം തേടുന്ന കമല… പുരുഷലോകത്തിന്റെ അളവുകോലുകളാലുള്ള നിര്‍ണ്ണയങ്ങളില്‍നിന്നു പുറത്തുകടക്കുന്ന കഥാപാത്രങ്ങളിലൂടെ സ്ത്രീജീവിതത്തെ പുത്തനായി വ്യാഖ്യാനിക്കുന്ന രചന.

വിഷ്ണുമായ എം.കെ യുടെ ആദ്യ നോവല്‍

കാസ
പിലാസ

അനില്‍ ദേവസ്സി

കലിതുളളിപ്പെയ്യുന്ന മഴപോലെയായിരുന്നു കട്ടിപ്പൊക്കം ഗ്രാമക്കാരുടെ ജീവിതം. മേലെ കരിമ്പടം പുതച്ചുകിടന്നിരുന്ന മേഘങ്ങളൊക്കെയും ഉരുകിയൊലിച്ചപ്പോള്‍ കടപുഴകി വീണത് ഒരുപാട് ജീവിതങ്ങളാണ്. ജീവിതത്തോടായിരുന്നു അവര്‍ യുദ്ധം ചെയ്തത്. മണ്ണായിരുന്നു അവരുടെ ആയുധം. പൊന്ന് വിളയിക്കലായിരുന്നു വിജയം. അതിനിടയില്‍ അവര്‍ തന്ത്രങ്ങള്‍ മെനഞ്ഞുകൊണ്ടേയിരുന്നു. കണ്‍മുന്‍പിലുണ്ടായിട്ടും കാണപ്പെടാതെപോയ വാഗ്ദത്ത ഭൂമിയില്‍ പുതിയ സാമ്രാജ്യം പടുത്തുയര്‍ത്താനുള്ള പദ്ധതികള്‍ അവര്‍ ആവിഷ്‌കരിച്ചു. ഇമ്മട്ടിച്ചാച്ചനും കുഞ്ഞേശുവും കുഞ്ഞമ്പുവും ബ്രീജീത്താമ്മയും കരിവണ്ടും എല്‍സിയും കറിമങ്കയും മിഖായേലച്ചനും റീത്തയും നിറഞ്ഞുനില്ക്കുന്ന കാസ പിലാസ സങ്കീര്‍ണ്ണമായ ജീവിതാവസ്ഥകളുടെ കേറ്റങ്ങളിലൂടെയും ഇറക്കങ്ങളിലൂടെയും കലങ്ങിമറിഞ്ഞ് വിലയം പ്രാപിക്കുന്നു.

കപ്പിത്താന്റെ
ഭാര്യ

ബിപിന്‍ ചന്ദ്രന്‍

വായിക്കാന്‍ കൊള്ളാവുന്ന ഒരു കഥ വേണമെങ്കില്‍ അറയ്ക്കാതെ, മടിക്കാതെ ഇങ്ങോട്ട് വന്നോളൂ. ബാറില്‍ കേറി ഒരു നിപ്പനടിക്കുന്ന മട്ടില്‍ ഒറ്റയടിക്ക് ഒരു കഥ ആസ്വദിച്ചിട്ട് പൊയ്‌ക്കോളൂ. നാടന്‍ വാറ്റു പോലെ സാധനം നല്ല സ്വയമ്പനാണ്. ഒട്ടും മുഷിയില്ല. ജീവിതത്തിന്റെ ആമാശയത്തിലേക്ക് അതിങ്ങനെ എരിഞ്ഞിറങ്ങും. അവിടെക്കിടന്ന് ഇത്തിരി പൊള്ളും. പിന്നേ തലയ്ക്ക് പിടിക്കൂ. വായനയുടെ ഓര്‍മകളില്‍ കൂടെ കൊണ്ടുനടക്കാന്‍ കപ്പിത്താന്റെ ഭാര്യയെ ഞങ്ങള്‍ക്കു തന്ന കഥയുടെ രാജകുമാരന്‍ ബിപിന്‍ ചന്ദ്രന് ഒരുമ്മ.
– ബെന്യാമിന്‍

ബിപിന്‍ ചന്ദ്രന്റെ ആദ്യ നോവല്‍

തമോദ്വാരം

സുധീശ് രാഘവന്‍

എവിടെയാണ് ഉപേക്ഷിച്ചുപോകേണ്ട ഇടം? മനുഷ്യതലച്ചോറുകളൂടെ വാര്‍പ്പിടങ്ങള്‍ ഉപേക്ഷിച്ച്, അധികാരരൂപമായ അറിവിനെ ഉപേക്ഷിച്ച് ഇരുണ്ട വഴികളിലൂടെ രായപ്പന്‍ നടന്നു. ചരിത്രത്തെ കുടഞ്ഞെറിഞ്ഞ് തന്നെത്തന്നെ ഉപേക്ഷിക്കുകയായിരുന്നു, ജയരാജന്‍. ജയരാജന്റെ ആ യാത്രയുടെ വിപരീത സന്ന്യാസത്തിലാണ് രായപ്പന്റെ ഉണ്മ ഉരുവം കൊള്ളുന്നത്. ദളിത് കീഴാള ജീവിതവും അനീതിയില്ലാത്ത നാളേക്കു വേണ്ടിയുള്ള സ്വപ്നവും നരബോധത്തെ പൊതിഞ്ഞു മൂടുന്ന ചരിത്ര സങ്കീര്‍ണ്ണതകളും ഈ നോവലിന്റെ സത്തയാണ്. കഴിഞ്ഞ നൂറ്റാണ്ടിന്റെ ആദ്യ പകുതിയിലെ ഇരുളില്‍ ശ്രീനാരായണഗുരു, പി. കൃഷ്ണപിള്ള, എ.കെ.ജി, എന്‍.സി. ശേഖര്‍ തുടങ്ങിയ ചരിത്ര പുരുഷന്മാര്‍ കഥാപാത്രങ്ങള്‍ക്കൊപ്പം തെളിഞ്ഞു മറയുന്നു. ജീവിതത്തിന്റെ അടിത്തട്ടില്‍ നിന്ന് ഇനിയൊരു പുലരി സാദ്ധ്യമാണോ എന്ന വലിയ ചോദ്യം ഈ നോവല്‍ ഉന്നയിക്കുന്നു.

The
OLD MAN
and the SEA

വൃദ്ധനും
വന്‍കടലും

ഏണസ്റ്റ് ഹെമിങ് വെ

ഒരു കിഴവന്റെയും കടലിന്റെയും കഥ പറയുകതന്നെയാണ് ഈ കൃതി. കടലും കിഴവനും തന്നെയാണ് ആ കൃതിയുടെ ഏറ്റവും നല്ല വ്യാഖ്യാനം, ഹെമിങ് ഉപയോഗിച്ച ഓരോ വാക്കും ചലനവും വലിയൊരു ദര്‍ശനത്തിന്റെ ആവിഷ്‌കാ രത്തിന് കണ്ടെത്തിയ ഘടകങ്ങളാണ്. ജീവിതത്തെപ്പറ്റി, മരണത്തെപ്പറ്റി പരാജയ ത്തെപ്പറ്റി, പ്രത്യാശയെപ്പറ്റി ജീവിതത്തില്‍ നിന്നുള്ള മടക്കയാത്രയെയും തിരിച്ചു വരവിനെപ്പറ്റിയും അങ്ങനെ എക്കാലവും മനുഷ്യനെ ചൂഴുന്ന പ്രശ്‌നങ്ങളുടെ ദാര്‍ശ നികമായ അവലോകനമാണ് ഈ കൊച്ചു പുസ്തകം. -എം.ടി. വാസുദേവന്‍ നായര്‍

ജന്മാന്തരങ്ങള്‍ക്കപ്പുറം

അബ്ദുള്‍റസാഖ് ഗുര്‍ന

വിവര്‍ത്തനം സുരേഷ് എം.ജി

നോബല്‍ സമ്മാനജേതാവായ അബ്ദുല്‍റസാഖ് ഗുര്‍നയുടെ ജന്മാന്തരങ്ങള്‍ക്കപ്പുറം എന്ന നോവലിന്റെ പശ്ചാത്തലം കിഴക്കന്‍ ആഫ്രിക്കയിലെ ടാര്‍സാനിയയാണ്.
ഒന്നാം ലോകമഹായുദ്ധത്തിനും വളരെ മുമ്പ് നടന്ന കഥയാണിത്. അക്കാലത്ത് ജര്‍മ്മന്‍ അധിനിവേശത്തിലായിരുന്ന ആഫ്രിക്കന്‍ പ്രവിശ്യകളില്‍ അധികമാരും അറിയാത്തതും പറയപ്പെടാത്തതുമായ ഒരു കാലഘട്ടം. അധികാര വര്‍ഗ്ഗങ്ങളുടെ ക്രൂരതകളും കച്ചവടതന്ത്രങ്ങളും. അവര്‍ക്കെതിരെ പോരാടേണ്ടിവരുന്ന ആഫ്രിക്കന്‍ വംശജരായ കൂലിപ്പട്ടാളക്കാരുടെ ദയനീയ ജീവിതചിത്രങ്ങള്‍. ഖലീഫ, ആഫിയ, ഹംസ, ഇലിയാസ് തുടങ്ങിയ കഥാപാത്രങ്ങളെ ചേര്‍ത്തുപിടിച്ച്, ഒരു ജനതതിയുടെ കഥ പറയുകയാണ് ഗൂര്‍ന. ഇന്ത്യയിലെ ഗുജറാത്തില്‍ നിന്നാണ് ഖലീഫയുടെ പിതാവായ കാസീം കപ്പല്‍ കയറി ആഫ്രിക്കയിലെത്തി എന്നത് രാജ്യാന്തരകുടിയേറ്റങ്ങളുടെ ആദ്യകാലചരിത്രമാണ്. ആഫ്രിക്കന്‍ ഭൂഖണ്ഡത്തിലെ മുന്നിലേറെ തലമുറകളുടെ കഥ പറയുന്ന ഈ കൃതി വിശാലമായ കാന്‍വാസില്‍, വായനാസുഖം നഷ്ടപ്പെടുത്താതെ, തികഞ്ഞ കൈയടക്കത്തോയെയാണ് ഗൂര്‍ന ആഖ്യാനം ചെയ്തിട്ടുള്ളത്.

ക്രിക്കറ്റ് ഹൗസ്

ഗണേഷ് ബാല

ഒറ്റയിരുപ്പിന് വായിച്ചുതീക്കാവുന്ന ഒരു കുഞ്ഞുനോവല്‍. എന്നാല്‍ അതിലൂടെ മിന്നിമറയുന്ന ഭൂതകാലസന്ദര്‍ഭങ്ങളുടെ സമാന്തരങ്ങള്‍ സ്വാന്തം ജീവിത്തതില്‍നിന്ന് വായനയ്‌ക്കൊപ്പം മനസ്സില്‍ തള്ളിക്കയറുവുന്ന അനുഭവം നിങ്ങള്‍ക്കുണ്ടായേക്കും. സംഗീതവും സാഹിത്യവും ക്രക്കറ്റും ബാല്യയൗവനചാപല്യങ്ങളും പറഞ്ഞു ഫലിപ്പിക്കാന്‍ കഴിയാത്ത നൊസ്റ്റാള്‍ജിക് നെഞ്ചുവേദനയും നിങ്ങള്‍ അറഞ്ഞേക്കും. എണ്‍പത്തിമൂന്നു കാലഘട്ടത്തെക്കുറിച്ചുള്ള ഈ എണ്‍പതു പേജ് നോവലില്‍ എണ്‍പതോളം കഥാപാത്രങ്ങളോ എന്നു വിസ്മയിച്ചേക്കും. ക്രിക്കറ്റിനെ മതമാക്കിയ ഒരു രാജ്യത്തെ മേളാപുരം എന്ന ചെറുഗ്രാമത്തില്‍ അരങ്ങേറിയതെന്ന് സങ്കല്‍പ്പിച്ചെഴുതപ്പെട്ട ഈ നോലവിനെ ഇമ്മട്ടില്‍ നൊസ്റ്റാള്‍ജിക് ആക്കുന്ന എഴുത്തുകാരന്‍ ഇപ്പോള്‍ അങ്ങു ദൂരെ ഓസ്‌ട്രേലിയയില്‍ ഇരുന്നാണല്ലോ ഇതെഴുതിയത് എന്നോര്‍ത്ത് ഗണേഷ് ബാലക്ക് ഒരു സലാം പറഞ്ഞേക്കും.